Nigeria TV Info — Rahoton Labarai

Rundunar Sojin Najeriya ta sanar da dawo da Makarantar Koyar da Rundunar Sojin Musamman daga Buni Yadi da ke Jihar Yobe zuwa Karamar Hukumar Doma a Jihar Nasarawa.

Babban Hafsan Sojin Kasar (COAS), Laftanar Janar Olufemi Oluyede, ne ya bayyana hakan yayin bikin sanya tubalin ginin wasu sabbin ayyuka a hedikwatar Rundunar Special Forces ta 4 da ke Doma.

A cewar Oluyede, wannan mataki na daga cikin shirye-shiryen inganta dabarun aiki da kuma samar da sauƙi wajen samun kayayyakin aiki da na horo domin magance ƙalubalen tsaro da ke ƙaruwa a faɗin ƙasar.

Ya ƙara da cewa kafa makarantar horaswar a Jihar Nasarawa zai kuma ƙara ƙarfafa tsaro a yankin Arewa Ta Tsakiya tare da bada gudummawa wajen ci gaba da ƙoƙarin samar da zaman lafiya da kwanciyar hankali a ƙasar.

Babban Hafsan Sojin ya kuma tabbatar da ci gaba da jajircewar rundunar sojin wajen kare rayuka da dukiyoyin jama’a, inda ya jaddada cewa wannan sauye-sauye na daga cikin muhimman matakan da za su ƙarfafa tsarin tsaro na ƙasar baki ɗaya.

Oluyede ya yi amfani da wannan dama wajen yabawa jami’ai da sojojin rundunar Special Forces bisa ƙoƙari da sadaukarwar da suke nunawa wajen yaƙi da ta’addanci, ‘yan bindiga da sauran aikace-aikacen laifi a faɗin ƙasar.