Nigeria TV Info 

Gwamnatin Tarayya Ta Kira Taron Gaggawa, Ta Gayyaci EFCC, DSS da 'Yan Sanda Domin Dakile Boye da karkatar da Iskar Girki (LPG)

Gwamnatin Tarayya ta Najeriya ta kira taron gaggawa tare da manyan hukumomin tsaro da masu ruwa da tsaki a fannin iskar girki (LPG), domin magance matsalar boye kayayyaki da karkatar da su, lamarin da ke haddasa karancin iskar girki da tashin farashinta a sassan kasar.

Taron ya hada da Hukumar Yaki da Cin Hanci da Rashawa (EFCC), Hukumar Tsaro ta Farin Kaya (DSS), Rundunar 'Yan Sandan Najeriya, da wakilan masana'antar LPG. Mahalarta taron sun tattauna hanyoyin da za a kara sanya ido kan rarraba iskar girki tare da hukunta duk wanda aka samu da laifin boye ko karkatar da kayayyakin.

Gwamnatin Tarayya ta jaddada kudirinta na tabbatar da cewa iskar girki ta kasance cikin sauki ga al'umma tare da dakile duk wani yunkuri na haddasa karanci ko tsadar kayayyaki saboda anfani na kashin kai.