Nigeria TV Info 

Tinubu Ya Yi Alkawarin Inganta Wutar Lantarki Ga ‘Yan Najeriya

Shugaba Bola Ahmed Tinubu ya yi wa ‘yan Najeriya alkawarin cewa za a samu ingantacciyar wutar lantarki a nan gaba, inda ya ce gyare-gyare da ake yi a bangaren wutar lantarki za su fara bada sakamako a fadin kasa.

Wannan alkawari ya zo ne yayin da matsalolin rashin daidaitaccen wutar lantarki ke ci gaba da shafar gidaje, kasuwanci da masana’antu a fadin Najeriya. Ministan Wuta, Adebayo Adelabu, ya bayyana cewa cigaban da ake gani a yanzu shi ne farkon matakai, inda gwamnati ke shirin kara yawan samar da wuta, inganta hanyoyin jigilar wuta, da kuma rarraba ta yadda zai amfanar da kowa.

Adelabu ya kara da cewa Najeriya ta samu karin samar da wuta da kuma inganta hanyoyin watsawa, wanda ke nuna alamun da bangaren ke samun kwanciyar hankali. Gwamnati na fatan ganin wutar lantarki mai dorewa da ba ta yankewa ga ‘yan Najeriya, wanda za a cimma a karkashin wannan gwamnati.

Haka zalika, gwamnatin Tinubu ta bayyana cewa tana kokarin kera wasu kayan aikin wuta a gida kamar mita, transformers da wayoyi, domin rage dogaro da shigo da kaya daga waje da kuma karfafa bangaren wuta.

Ko da yake kalubale suna nan, ciki har da rashin isasshen kayan aiki da matsalolin rarrabawa, gwamnati na tabbatar da cewa shirin “Renewed Hope” yana mayar da hankali kan wuta a matsayin muhimmin bangare na habaka tattalin arziki, samar da ayyukan yi da ci gaban kasa.