Nigeria TV Info

NCDC Ta Bukaci Jihohi su Kara Wayar da Kai a Al’umma Yayin da Cutar Zazzabin Lassa ke Karuwa

Hukumar Kula da Cututtuka da Rigakafi ta Najeriya (NCDC) ta yi kira ga gwamnatocin jihohi da su ƙara ƙaimi wajen wayar da kan al’umma duk tsawon shekara don dakile yaduwar cutar zazzabin Lassa.

A cikin rahoton ta na makon cututtuka na 31, hukumar ta tabbatar da bullar sababbin mutum tara da aka gano dauke da cutar a jihohin Ondo, Edo, da Taraba — karin yawa sosai idan aka kwatanta da mutum uku da aka gano a makon da ya gabata.

A cewar NCDC, wannan ya kai jimillar wadanda aka tabbatar suna dauke da cutar a shekarar 2025 zuwa mutum 836 a jihohi 21 da kuma kananan hukumomi 105. Yanzu haka, adadin mace-macen ya kai kaso 18.7 cikin 100, wanda ya fi kaso 17.3 da aka samu a daidai wannan lokaci a shekarar 2024.

Hukumar ta jaddada cewa gano cutar da wuri, fadakar da al’umma, da kuma bin matakan kariya suna da matuƙar muhimmanci wajen dakile yaduwar cutar.