Nigeria TV Info 

Kotu Ta Yanke Wa Tsohon Ministan Wutar Lantarki Saleh Mamman Hukuncin Shekaru 75 A Gidan Yari

Babbar Kotun Tarayya da ke Abuja ta yanke wa tsohon Ministan Wutar Lantarki, Saleh Mamman, hukuncin zaman gidan yari na shekaru 75 bisa samunsa da laifin karkatar da kudade da kuma halasta kudaden haram da suka kai Naira biliyan 33.8.

Mai shari’a James Omotosho ya bayyana cewa hukumar EFCC ta gabatar da hujjoji masu karfi da suka tabbatar da cewa tsohon ministan ya karkatar da kudaden da aka ware domin ayyukan samar da lantarki na Mambilla da Zungeru.

Kotun ta ce an same shi da laifi a dukkan tuhume-tuhume 12 da ake yi masa. An yanke masa hukuncin shekaru bakwai-bakwai a mafi yawan tuhume-tuhumen, yayin da wasu suka samu karin shekaru uku da biyu, wanda ya kai jimillar shekaru 75 idan aka hada.

Kotun ta kuma bada umarnin kwace wasu kadarori da kudaden kasashen waje da aka gano suna da alaka da laifin. Haka kuma, an umurci jami’an tsaro da Interpol su kamo Mamman duk inda yake bayan ya ki bayyana a gaban kotu lokacin yanke hukunci.

Hukumar EFCC ta gurfanar da shi tun a shekarar 2024 bisa zargin wawure kudaden gwamnati lokacin da yake minista a gwamnatin tsohon shugaban kasa Muhammadu Buhari.